Zer berri?

Sendi, Getxoko Egizu elkarteak, bertako Udalarekin elkarlanean kudeatzen duen proiektua da, Sendiren jarduera hiru sailetan banatzen da:

• Euskaraz ikasteko diru-laguntzen informazioa ematen dute.
• Hainbat jardueren antolaketa familientzat: Tailerrak, ikastaroak…
• Gurasolaguna: Ikastetxeetako gurasoentzako propio prestatutako berbalagun taldeak.

Proiektu honek duen ezaugarririk nabarmenena da eskaintza gehienetan haurrak eta gurasoak biltzen dituela haien hizkuntz erabileran eragiteko asmoz.

Hauxe da otsailerako prestatu duten eskaintza:

• Kamiseta tailerra.
• Arte tailerra: Zirkoa
• Mozorro tailerra
• Argazkigintza digitala.
• Eski asteburua Getxoko familientzat.

Informazio gehiago:
http://www.blogari.net/sendi
http://www.blogari.net/egizu

Iaz Espainiako Narratiba Saria irabazi zuen liburua eskuan hartuta (Bilbao-New York-Bilbao, Kirmen Uribe), eta eskerren atalari errepasoa egiten, hara non aurkitu ditudan Dudu Thiam, Mamadou Bakhoum, Ismaila Senghor eta Mouhamed Dieng senegaldar Berbalagunen izenak. Izan ere, Uribe liburua idazten zebilela laguntza eskatu zien Ondarroako Berbalagun egitasmoko senegaldar eta koordinatzaileari. Asmoa, senegaldarrek itsasoarekin daukaten loturaren berri edukitzea. Azkenean, hitzordua egin, eta bertan berba egindakoak lekutxoa izan zuen liburuan. Berbalagun-Senegal-Uribe lotura sortu zen horrela. Berbalagunok ere sariaren parte bihurtu ginen horrela.

Liburua irakurri ez duenarentzako ariketa planteatzen dugu Ondarruko Berbalagunok. Nobelako zein orrialdetan aurkitu daiteke senegaldarrek Uriberi emandako informazioa? Animatu, liburuak merezi du eta.

Urtarrilaren 19an Bagera elkarteak kudeatzen duen Donostiako Mintzalaguna programak Donostiako Hiritar Merezimenduaren Garaikurra jaso zuen beste lau pertsona eta erakunderekin batera. Web gune honetatik Donostiako Mintzalaguna zoriondu nahi dugu, 1993. urtetik egindako lan zoragarriarengatik.

Egizu Getxo euskaldunekoek zabaldu dute 2010 urtea asmo berriekin. Egin klik beheko agendan eta Egizuko berriak ikusteko!

Urtarrilean liburu eta disko zaharren azoka antolatuko du Arrasateko Zahar-Berrik, horretarako berbalagun eta euskaltegiko ikasleen laguntza izanen dute bertako mintzapraktika programari bultzada emateko.

Informazio gehiago HEMEN.

Azken urteotan Mintzapraktika programan Euskal Herrian zehar hainbat herri eta eskualdeetan zehar ari dira zabaltzen.
Zabaltze honen adibide argi bat Gorbeialdeko Mintzalaguna da. Zigoitia, Zuia, Urkabustaiz, eta Legution taldetxoak sortu dira, mendi taldeaz gain. Proiektu hau Bidabarri, Lan eta jolas, Kirikio, Txirritola, eta Gurien euskara elkartea, Zuiako Gau Eskola (AEK) eta Topagunearen elkarlanaren ondorioz aurrera atera da.
Beraz, hemendik aurrera Arabak beste Mintzalagun proiektu bat izango du, ea aurrerantzean gehiago ere sortzen diren.

Abenduaren 19an, larunbata, Galdakaon Gabonen sarreran gaudela aprobetxatuz askari-afari ezin hobea izango dugu arratsaldeko 20:30ean. Horretarako plater egokiagorik ez eta neguko tenperatura hotz hauen aurka aritzeko salda gozo-gozoa hartuko dugu. Baina ez edozein salda.

MENUA: BERTSO SALDA

Bertso salda on bat prestatzeko errezeta:

1. Osagaiak:
- 6 bertsolari puntakoak: Maialen Lujanbio, Amets Arzallus, An Mari Peñagarikano, Miren Amuriza, Aitor Mendiluze eta Unai Iturriaga.
- Gaijartzaile 1 : Arkaitz Estiballes
- Areto eder 1 : Galdakaoko Torrezabal Kultur Etxea
- Bertso gose dagoen publikoa (neu barne)
2. Prestaketa:
- Nahasi ondo osagai guztiak eta utzi bi ordutan su lasaian egosten
3. Emaitza:
- Bertso saio bizi ta gustagarri bat disfrutatu.

Prezioa: merke-merkea ( 4 € helduak / 3€ bazkideak, gazte txareta eta ikasleak)

Azaroaren 19an Arrasateko Zahar Berrik Ardobira antolatu zuen. Bertan, gaztain bero-beroak eta ardoa izan ziren salgai. Hau guztia, Zahar-Berri programako Berba lagun taldeak eta antolatzen diren ekintzak aurrera eramateko bultzada izan da.
Aipatu behar da ekintza oso arrakastatsua izan zela, jende mordoxka gerturatu zen bertara, gaztainak, ardoa eta salgai jarri dituzten egutegiak erosteko asmoz.

Astebete beranduago, azaroaren 26an, Iruñerriko eta Tafallako Mintzakide egitasmoak harrera ekitaldi bat antolatu zuen Iruñeko Zaldiko Maldiko elkartean. Ekitaldi hau ere arrakastatsua izan zen antolatzaileen iritziz.

 Euskara ikastea eta mendia igotzea antzekoak dira. Bietan abian jartzeko hasierako motibazioa ezinbesteko da. Beharko dugun guztia zakuan sartuta, nagitsu batzuk, oso animatuta besteak, irteten gara etxetik. Inoiz egin ez baduzu maldan gora egitea lan nekeza izan daiteke, baina lehen muinoak igarota maiztasunez praktikatzeak duen garrantziaz konturatzen gara.Horrelakoetan sherpa euskaldunak gure ondoan bidelagun izatea inportantea da, haiek ondo entrenatuta daude eta euren aurrera! eta aupa! guztiei esker aise ibiliko gara euskararen tontorrera heldu arte.

Antzekoak direlako beharbada sortzen dira mintzapraktika egitasmoetan horrenbeste txango eta mendi-talde. Bilbo, Iruñea, Getxo, Baiona… eta orain ere Ezkerraldean mendilaguna sortu dute. Animatuko zara zeu ere euskararen gailurrera igotzen?

Eusko Jaurlaritzako Hizkuntza Politikarako Sailburuordetzak, Topagunearekin eta AEK-rekin batera, mintzapraktika egitasmoaren eraginkortasuna neurtzeko ikerketa jarri du abian. Ikerketa Aztiker ikerguneak egingo du.

Ikerketaren helburua esperientzia hau zabaldu eta hobetzeko informazio baliagarria eskuratzea da.

Mintzapraktika egitasmoen kalitatea hobetzeko eta horien zabalkunderako, esku artean dugun ikerketa ongi egiteak sekulako garrantzia du. Eta ikerketaren emaitzak fidagarriak izan daitezen, ahalik eta lagun gehienek erantzutea lortu behar dugu.

Galdeketa betetzen duten guztiek zozketa batean parte hartuko dute, eta taldea izango da irabazle. Aukeran izango dute afaria edo aste bukaerako egonaldia. Zure laguntza saritzeko aski ez bada ere, zozketan irabazle suertatzen den galdetegiak taldearentzat eta dinamizatzailearentzat ekarriko du saria.