Zer berri?

Mintza Eguna, bazkarirako txartelak eskuratu

mintzapraktika — Fri, 11 May 2012 09:52:10 +0000

Mintzalagunok, ekainaren 2an Sarturtzin elkartuko gara!

Bazkarirako txartelak maiatzaren 23a arte eskuratu ditzakezue zuen herriko dinamizatzailearen bidez. Helduen menua 20€ dira, umeena 10€.

Animatu!

Eskura itzazue Mintza Eguneko bazkarirako txartelak

mintzapraktika — Wed, 09 May 2012 08:08:30 +0000

Aurreratu genizuen bezala, Mintza Eguna Santurtzin izango da, ekainaren 2an. Hilabete falta da mintzalagunen festarako, eta egitaraua osatu dugu jada. Hona hemen:

11:00 Harrera eta hamaiketakoa, Santurtziko portuan

12:00 Ibilaldi gidatua / Ume eta gurasolagunentzako jolasak

13:30 Berba Kalejira

14:30 Bazkaria Gernika Parkean

16:30 Sari banaketa

17:00 Euskal Erromeria “Aldats” taldearekin

20:00 Kantu-triki-poteoa

… eta sorpresa gehiago!

Bazkarirako txartelak maiatzaren 23ra arte eskuratu ditzakezue, zuen herriko mintzapraktika arduradunaren bidez. Helduen menua 20€tan dago, eta umeen menua ere egongo da. Gainera, zeliakoek eta barazkijaleek menu berezia eska dezakete.

Azkenik, ekainaren 3an Ibilaldia izango da Trapagaranen. Santurtzitik gertu dago, eta aukera polita da Bizkaian asteburu pasa egiteko. Herriko berbalagunek ostatu batzuen zerrenda eman digute, lotan geratu nahi dutenek aukera izan dezaten.

Santurtzin elkartuko gara!

Mintza Eguna ekainaren 2an izango da, Santurtzin

mintzapraktika — Tue, 27 Mar 2012 13:40:50 +0000

Udaberria heldu da, eta urtero bezala, Mintza Eguna ere gero eta hurbilago dago. Aurtengoa Santurtzin izango da, eta mintzalagunen jaia Bizkaiara itzuliko da berriz.

Ekainaren 2koa, gainera, berezia izango da: lehen aldiz, gurasolagunei egokitutako egitaraua izango dugu, ume eta gurasoek elkarrekin eta euskaraz jolastu dezaten.

Oraingoz, hori baino ez. Aurrerago emango dizuegu egitarauaren berri… baina gorde eguna agendan!

4.800 Mintzalagun inguru gara!

mintzapraktika — Fri, 27 Jan 2012 11:45:14 +0000

Urte berriarekin batera, 2011ko Mintzapraktika egitasmoko datuak bildu ditugu, eta pozik gaude. Izan ere, 4.800 lagun inguru ari dira, astero astero, mintzalagun programetan parte hartzen, aurreko urtean baino mila gehiago. Egitasmoak egonkortzeaz gain, indarra hartzen ari dira, eta bide horretan aipagarria da Iruñerriko taldeek izan duten partaide gorakada. Lekuan lekuko koordinatzaileen lana eta mintzalagunen aldaera berriak dira arrakasta honen eragile nagusiak. Berbalagunak, gurasolagunak, euskalkilagunak, mendi taldeak… asko dira euskaratik eta euskaraz bizitzeko hautua egin dutenak.

Zu gabe ezin, zatoz eta egin! Mintzalaguna, euskaldunon mundua.

Gero eta mintzalagun gehiago gara

mintzapraktika — Fri, 13 Jan 2012 10:50:26 +0000

Ikasturte berriko datuak biltzen ari gara eta, oraindik bukatu ez dugun arren, argi dago orokorrean mintzalagun kopuruak hazi egin direla. Donostian, Getxon, Gasteizen, Arrasaten… mintzapraktika taldeak herri askotan ari dira urterik urte indarra hartzen. Baina bereziki aipagarria da Iruñerriko kasua: iaz 270 lagun ibili ziren egitasmoan, eta 2011-2012 ikasturtean 416k eman dute izena.

Zorionak berbalagun, mintzalagun zein mintzakide guztiei!

MINTZALAWOOD- Izan zaitez gure Izarra¡¡

mintzapraktika — Fri, 07 Oct 2011 08:03:00 +0000

IZAN ZAITEZ GURE MINTZA-IZARRA

Aurkezpen Mundiala Nafarroa Oinez 11n. Urriaren 16an Tafallan, Ikastola ondoko gunean Mintzalagunen txokoan topatuko gaituzue.

Zatoz eta egin argazkia zure lagunekin.

udan ere euskara praktikatu!

mintzapraktika — Wed, 15 Jun 2011 08:31:42 +0000

Udan ere euskara erabiltzeari ez uzteko biderik zuzenena, bidea euskaraz egitea da. Barnetegi Ibiltarietan, bizikletaz eta oinez, ez dago eskola ordurik mintzapraktikara bideratuta daudelako, baina arduradunak irakasleak direnez edozein zalantza argitzeko prest dauzkazu. info+

Animatu eta ezagutu euskararen bide naturalenak!

MINTZA EGUNA 2011 ELIZONDON

mintzapraktika — Mon, 06 Jun 2011 11:35:11 +0000

Eguraldi ederra lagun 27o mintzalagun inguru bildu ginen pasa den larunbatean Elizondon. Goizean goizik ederki girotu genuen herria, bertako fanfarreren laguntzaz. Aukera izan genuen Pello Iriarteren eskutik Elizondoko historia eta istoriak ezagutzeko, elkarrekin bazkaldu genuen Merkatuen plazan, ostean proiektuari egindako ekarpenagatik ondoko mintzalagunak saritu genituen: Txomin Urrestarazu, Adelina Otxoa, Josean Gomez, Ainhoa Arroniz, Urko Ikardo eta Jon Mikel Goikoetxea. Bukatzeko dantzarako gogoak zituenek ederki probestu zuten egunari bukaera emateko.

Argazkiak

GAUR AURKEZTU DA MINTZA EGUNA

mintzapraktika — Thu, 26 May 2011 14:57:25 +0000

Gaur Baztango Udalean aurkeztu da aurtengo Mintza Eguna. Bertan Martin Garde (Baztango Udaleko euskara zinegotzia), Oskar Zapata (Topagunea) eta Oianko Garde (Solaslaguna) egon dira egitarauaren berri ematen.

Mintza Eguna Elizondon

mintzapraktika — Mon, 23 May 2011 08:00:28 +0000

Seigarrenez ospatuko da Mintza Eguna aurten, non eta Elizondon. Mintzapraktika egitasmoetan parte hartzen duten milaka lagunei eskainitako eguna da, uda aurretik, antolatzen den bilkura handia, Euskal Herri osoko Solaslagun, Mintzalagun, Berbalagun, Solaskide, Mintzakideak elkartzeko eguna.
Baztan eta Bortzirietako Solaslaguna egitasmoko Oianko Garderekin hitz egin dugu Mintzalagunari eta Mintza Egunari buruz.

Zer moduzko erantzuna izan du Baztan, Malerreka eta Bortzirietako Solaslagunak hiru ikasturte hauetan?
Lehenengo urtean dinamizatzailerik gabe hasi ginen lanean, nahiko zaila izan zen taldeak martxan paratzea eta hauek funtzionatzen jarraitzea. Bi urtetik hona berriz, dinamizatzailearekin desberdina izan da, hobeki lan egin dugu, taldeen jarraipena, saio osagarriak, bloga eta bertze hainbat martxan paratu ahal izan baitugu.
Erantzuna ezin hobea izan da, duela hiru urtetik hona hirukoiztu egin dugu mintzapraktikan ari diren jende kopurua, aurten 40 izatera ailegatu garelarik. Inguruan jada, Solaslaguna hitza ez da hain arrotza, jendeak ezagutzen du eta geroz eta gehiago dira egitasmoan parte hartu nahi dutenak.

Zeintzuk dira aurrera begira dituzuen erronkak?
Gure erronka nagusia, taldeak tinkotzea edota finkatzea da, oraingoz jendeak errepikatzen du baina arras guti dira mantendu diren taldeak.
Bertzalde, jende gehiago erakarri nahi dugu egitasmora, herriak bertan parte hartzea inportantea da. Eta nola ez, Solaslaguna egitasmoa ahal den neurrian hedatu eta zabaldu nahi dugu, geroz eta oihartzun handiagoa izan dezan. Egitasmoa denon ahotan egon behar du!

Zein egitarau prestatu duzue Mintza Egunaren seigarren ediziorako?
Orain arte egindako Mintza Egunak aski ongi antolatuak izan direla uste dugu, guk ez dugu aparteko gauzarik eginen, aitzinekoen antzerakoa izanen da:
Goizean goiz ongi etorria eta hamaiketakoa eskainiko diegu gurera hurbiltzen diren guztiei. Ondotik ibilaldi gidatua Elizondon barna fanfarrearekin alaiturik. Bazkal aitzinean, ohitura den bezala, bermuta hartuko dugu eta denak elkarrekin bazkaltzerat joanen gara Merkatu Plazara, eguraldi txarra eginez gero, bazkaria Baztango Pilotalekuan eginen dugu.
Bazkal ondoren, sari banaketa, bertsolariekin eta aurkezle berezien laguntzarekin eta bestari akabaila emateko erromeria izanen dugu Mikel Salaberriren eskutik.

Argazkia: Ttipi-ttapa